第二篇 《幸运的快递员》第一章（1 / 1）

引子

俾雷劈，俾雷公劈中果嘀人，通常会去饮孟婆汤。不过，雷公响离地十万九千里噶空中，整道闪电落来，九成九系劈中佢想劈果个身边噶花花草草，目标就毫发无损。根据联合国响217年公布噶数字，地球响217年俾雷劈中噶人，概率系125%，仲低过中五百万双色球噶概率。

俾雷劈，通常都唔会系好事，不过，宇宙甘大，充满神奇，我地哩个故事噶主人公，就因为俾雷公睇中，赠佢一击，意外开挂，从此踏入通往巅峰噶道路，成为人生赢家。

伊毛城有个送外卖噶快递员，名叫徐建宗，每日开住部蕉仔牌两轮电动鸡，响马路横冲直撞，争分夺秒咁送蛋糕，送奶茶，送外卖……一日基本上无停，做11个钟头左右，月入大概8—9千蚊，唔俾客人投诉，就会多几百文奖金，如果有投诉，就一两日白做咁样。佢女朋友就长期失业，两个人花费开销都系能够唔使就唔使，不过哩家甘样噶物价同房租水电，一万文一个月都好辛苦，何况两个人。

今日，佢女朋友佟花又接到佢阿妈电话，问佢几时嫁得，两母女响电话讲左几分钟，伯母就放低一句：“你都唔细咯，阿女。再嫁唔出去，就返来乡下揾另外一个。”跟手就挂左电话，剩低佟花响到慢慢细品果句话。

徐建宗终于放工返到出租屋，今日佢唔好彩，遇到个变态的客户，响外卖单备注要求帮手买烟同托一箱荔枝上八楼。买两包南洋双喜烟叫外卖哥先垫付，果箱荔枝又重，足足有十公斤。外卖哥当然唔做(第一，做咩要垫付烟钱；第二，送外卖唔包含送荔枝，帮手系人情，唔帮手系道理去到目的地，将外卖俾客户就交接签收走人。谁知道个客户响手机点击投诉，外卖平台唔仔细甄别，又偏袒客户，随便就界定徐建宗服务态度唔好，唔够积极，克扣2文。

佟花问徐建宗食过晚饭未？徐建宗一肚都系气。佢哩家又点食得落饭呢？

徐建宗望住个女朋友，粒声唔出。佟花望住个男朋友，想讲野，但说话去到嘴边，又无讲到出来。两个人各自坐响饭台一边，你眼望我眼甘望左十分钟。

终于，佟花忍受唔住呢个气氛，企起身问徐建宗：“你要唔要饮汤，今晚系粟米红萝卜煲脊骨，我装碗俾你好唔好？”

徐建宗响外边跑左成日，点会唔肚饿，只系头先谷住到气，食唔落。女朋友哩家再问佢饮唔饮汤，佢马上就点头要饮汤。

一碗热气腾腾，香味四溢噶汤，可以治愈好多烦心噶事情。但系，又可以成为好多烦事噶开端。

趁徐建宗饮紧汤，佟花插一句话：“阿妈又问我地几时拉埋天窗喔？”

徐建宗听到哩句话，怔左一下，望住个女朋友，微微咁碌大左佢对眼。

佟花又再问佢：“你几时肯娶我过门啊？我地都唔细嘎拉，我嘀姊妹剩返我未嫁咋。”

徐建宗就讲：“娶，听日就去民政局，九个九，娶你返来，嘿嘿。哦，不过民政局好似要预约，听日唔得。”

“你痴线嘎咩，九个九，我同你行左三年几。先九个九，你有无咁狼死啊？礼金都想悭返。”佟花噶语气，幽怨得来又带住几分嗔怒。

“系呀，哩家咁噶收入，你又长期度地，仲想要咩礼金，我养你咁耐，使噶食噶用噶都系我噶，你跟我果时就知我系外卖仔啦。”徐建宗驳返转头。

“咁噶野你都讲得出口，你系唔系人来嘎，咩叫我跟你果时食噶用噶使噶都系你噶，我系你女朋友，系你未婚妻，咁样唔系正常咩？”佟花一时兴起，左手叉腰，顶起心口，右手食指指住徐建宗，一轮嘴咁讲。

“嗱嗱嗱，唔好以为你煲个汤，炒碟饭就可以手指指打横来。”徐建宗都不甘示弱。

“咩手指指，咁叻你来做家头细务。”佟花喊腔已经开始起。

……

两个人相处得耐，拗气顶颈肯定有，不过好似今日咁大火气，互相数落对方的不是，可以用罕见来形容。

“你扯，我唔想见到你。”半个钟头前，佟花讲完哩句，拧转头入房间，顺手就关埋门，仲听到“咔”一声，上埋锁。

饭厅好似从一个堆满熔岩，火热的空间，突然堕入一个冰窟。一秒都唔使，无晒生气咁样。

徐建宗接受唔到哩个怪异噶气场，同样用“磅”一声噶关门声宣泄心里边噶不满，行左出屋企。